Të vizitosh një galeri arti apo muze për vetëm 60 minuta në muaj mund të jetë shumë më tepër sesa një mënyrë për të kaluar kohën e lirë. Sipas hulumtimeve të fundit, kontakti i rregullt me artin mund të ketë ndikim pozitiv në shëndetin mendor dhe mirëqenien e përgjithshme, transmeton PinkBizz.com.
Kjo ide po merr gjithnjë e më shumë vëmendje përmes konceptit të quajtur “doza e rekomanduar e artit”, sipas të cilit njerëzit duhet t’i kushtojnë të paktën një orë në muaj përjetimit të veprave artistike në hapësira si galeritë dhe muzetë.
Studimi i organizatës Art Fund, i cili trajton përfitimet e vizitave në institucione kulturore, mbështetet edhe në vlerësimet e Daisy Fancourt, profesoreshë e psikobiologjisë dhe epidemiologjisë në University College London. Sipas saj, përfshirja e rregullt në aktivitete artistike dhe përjetimi i drejtpërdrejtë i artit po njihen gjithnjë e më shumë si elemente të rëndësishme për shëndetin dhe mirëqenien.
Fancourt thekson se vizitat në muze dhe galeri mund të konsiderohen sjellje që promovojnë shëndetin, njësoj si ushqyerja e ekuilibruar, aktiviteti fizik dhe kalimi i kohës në natyrë.
Përfitimet e mundshme mbështeten edhe nga studime të tjera. Një hulumtim i publikuar në revistën British Journal of Psychiatry, ku u analizuan të dhënat e 2.148 të rriturve në Angli, gjeti se personat që merrnin pjesë të paktën një herë në muaj në aktivitete kulturore, si vizitat në muze, teatër apo kinema, kishin 48 për qind më pak rrezik të shfaqnin depresion.
Një tjetër studim, i publikuar në revistën shkencore Brain, Behavior and Immunity, shqyrtoi reagimet biologjike gjatë shikimit të veprave origjinale të artit. Rezultatet sugjeruan se përjetimi i drejtpërdrejtë i artit mund të aktivizojë procese që lidhen me uljen e stresit dhe rregullimin e funksioneve të sistemit imunitar.
Një detaj interesant i këtij hulumtimi ishte krahasimi mes veprave origjinale, të ekspozuara në galeri, dhe riprodhimeve të tyre të shikuara në laborator. Efektet pozitive të vërejtura gjatë kontaktit me veprat origjinale nuk u evidentuan në të njëjtën mënyrë te riprodhimet.
Kjo do të thotë se shikimi i një fotografie të famshme në telefon nuk e zëvendëson domosdoshmërisht përvojën e të qëndruarit përballë veprës origjinale. Ambienti, përmasat, ngjyrat dhe kontakti i drejtpërdrejtë me artin mund të jenë pjesë e rëndësishme e përjetimit.
Edhe pse këto gjetje nuk nënkuptojnë se një vizitë në galeri mund të zëvendësojë trajtimin mjekësor apo psikologjik, ato tregojnë se aktivitetet kulturore mund të jenë një mënyrë e vlefshme për t’i kushtuar më shumë vëmendje mirëqenies.
Prandaj, një orë në muaj në muze apo galeri mund të jetë një zakon i thjeshtë për t’u përfshirë në rutinën e përditshme. Përveçse ofron mundësinë për të zbuluar vepra dhe artistë të rinj, kjo përvojë mund të ndihmojë edhe në krijimin e një raporti më të mirë me veten dhe me botën përreth./PinkBizz.com