Përshkallëzimi i tensioneve dhe shqetësimet për sulme të mundshme me raketa në Lindjen e Mesme po ndikojnë drejtpërdrejt në kalendarin e sportit ndërkombëtar. Nga futbolli dhe Formula 1, te tenisi, boksi dhe sportet motorike, disa prej ngjarjeve më të rëndësishme janë anuluar, shtyrë ose zhvendosur në vende të tjera, transmeton PinkBizz.com.
Vendimi më i fundit është shtyrja e Kupës së Azisë 2027, e cila ishte planifikuar të zhvillohej në Arabinë Saudite nga 7 janari deri më 5 shkurt. Turneu, ku marrin pjesë 24 përfaqësuese, do të mbahet tani nga 23 dhjetori 2027 deri më 21 janar 2028, pothuajse një vit më vonë se planifikimi fillestar. Shqetësimet për sulme të mundshme nga lëvizja Houthi e Jemenit kanë ndikuar në këtë vendim.
Ndërkohë, sporti në rajon ishte prekur edhe më herët nga konflikti mes SHBA-së dhe Iranit, i cili çoi në anulimin e fundjavave të garave të Formula 1 në Bahrein dhe Arabinë Saudite në prill të këtij viti. Tani në pikëpyetje janë edhe garat në Katar dhe Abu Dhabi, të planifikuara për në fund të sezonit.
Futbolli përballet me ndryshime në kalendar
Liga Profesionale Saudite ka arritur të vazhdojë aktivitetin në pjesën më të madhe të saj, por disa ndeshje janë shtyrë për shkak të zhvillimeve në rajon. Mes tyre ishin edhe tri takime muajin e kaluar, pas përshkallëzimit të situatës.
Pas shtyrjes së Kupës së Azisë, është anuluar edhe xhiroja e plotë e kampionatit saudit që ishte planifikuar për këtë fundjavë. Liga ka deklaruar se kalendari do të riorganizohet për të krijuar një shpërndarje më të ekuilibruar të ndeshjeve, pa e lidhur zyrtarisht vendimin me konfliktin.
Ndikimet janë ndier edhe në Ligën e Kampionëve të Azisë. Al-Nassr, ku luajnë Cristiano Ronaldo dhe Kingsley Coman, nuk udhëtoi drejt Uzbekistanit për ndeshjen e planifikuar, duke përmendur ngarkesën e kalendarit dhe udhëtimet e shumta. Po ashtu, klubi Al-Wasl nga Emiratet e Bashkuara Arabe vendosi të mos udhëtojë drejt Arabisë Saudite për t’u përballur me Al-Nassr, ndaj takimi do të zhvillohet në një datë tjetër.
Pasiguria ka ndikuar edhe te familjet e futbollistëve që luajnë në rajon. Ellie Watkins, bashkëshortja e futbollistit Ollie Watkins, i cili luan për Al-Hilal, njoftoi përmes TikTok-ut se do të qëndrojë përkohësisht në Mbretërinë e Bashkuar me dy fëmijët e tyre, deri në qetësimin e situatës.
Në kampionatin saudit luajnë edhe emra të njohur si Gabriel Martinelli, Tijjani Reijnders, Darwin Nunez, Ivan Toney, Alexandre Lacazette, Ruben Neves, Sadio Mane dhe Joao Felix.
Formula 1 në pritje të vendimeve për garat në Lindjen e Mesme
Formula 1 po përballet me pasiguri për garat e fundit të sezonit 2026 dhe për fillimin e kampionatit të ardhshëm. Gara në Katar është planifikuar për 27-29 nëntor, ndërsa ajo në Abu Dhabi për 4-6 dhjetor.
Për momentin, organizatorët po vazhdojnë përgatitjet, pasi kanë marrë garanci për sigurinë nga burime të ndryshme qeveritare. Megjithatë, brenda sportit ka shqetësime për udhëtimin drejt rajonit. Nëse situata përkeqësohet gjatë javëve në vijim, të dyja garat mund të anulohen. Një nga alternativat e diskutuara është organizimi i një gare të vetme në Imola të Italisë, gjatë fundjavës kur ishte planifikuar gara në Abu Dhabi.
Edhe kalendari i vitit 2027 mund të pësojë ndryshime. Sezoni pritet të nisë në Bahrein më 12-14 mars, ndërsa Arabia Saudite do të organizojë garën në fundjavën pasuese. Megjithatë, tensionet mes Arabisë Saudite dhe rebelëve Houthi në Jemen e vënë në pikëpyetje zhvillimin e këtyre dy ngjarjeve.
Një nga opsionet që po shqyrtohet është zhvendosja e garës në Bahrein në Malajzi, ashtu siç ndodhi në tetor të këtij viti.
Ndryshime edhe në sportet motorike
Edhe Rally Dakar ka pësuar ndryshime. Gara që ishte planifikuar të zhvillohej në Arabinë Saudite në janar do të zhvendoset në Evropë dhe Afrikë. Edicioni i vitit 2027 do të nisë në Loule-Faro të Portugalisë dhe do të përfundojë në Marrakesh të Marokut.
Arabia Saudite kishte organizuar shtatë edicionet e fundit të Dakarit, ndërsa synimi i organizatorëve është që gara të rikthehet atje në vitin 2028.
Ndërkohë, Rally Arabia Saudite, pjesë e Kampionatit Botëror të Rally-t të FIA-s, e planifikuar për 12-15 nëntor, është anuluar.
Në anën tjetër, MotoGP do të zhvillohet këtë fundjavë në pistën Lusail të Dohas, në Katar. Megjithatë, ekipi Yamaha nuk do të marrë pjesë, pasi është këshilluar të mos udhëtojë nga Japonia.
Tenisi humb disa prej ngjarjeve të planifikuara
Turneu Six Kings Slam, i cili duhej të niste të shtunën në Riad, është shtyrë për dy muaj. Tani pritet të zhvillohet nga 27 deri më 30 dhjetor në ANB Arena.
Në garë janë paraparë të marrin pjesë Novak Djokovic, Alexander Zverev, Carlos Alcaraz, Alex de Minaur, Taylor Fritz dhe Learner Tien. Arena ndodhet rreth 31 kilometra larg aeroportit ndërkombëtar King Khalid, i cili ishte shënjestruar nga një sulm më 10 tetor, ku humbën jetën 13 persona dhe u plagosën 308 të tjerë.
Ndërkohë, finalet e WTA-së për vitin 2026 nuk do të zhvillohen në Arabinë Saudite. Organizatorët dhe autoritetet përkatëse kanë arritur marrëveshje për përfundimin e parakohshëm të kontratës së organizimit, ndërsa turneu do të mbahet në Indian Wells të Shteteve të Bashkuara.
Boksi dhe WWE vazhdojnë me ndryshime
Arabia Saudite ka qenë një nga destinacionet kryesore për organizimin e meçeve të mëdha të boksit. Javën e kaluar, boksieri meksikan Canelo Alvarez rifitoi titullin e WBC-së në kategorinë super të mesme, duke mposhtur Christian Mbilli.
Megjithatë, një pjesë e programit nuk u zhvillua sipas planit. Lindolfo Delgado u tërhoq nga përballja për titullin e IBF-së në kategorinë e lehtë kundër Arthur Biyarslanov, duke përmendur shqetësimet për sigurinë.
Në kalendar mbetet edhe aktiviteti Zuffa Boxing, ku Carlos Adames pritet të përballet me boksierin uellsian Gerome Warburton në Riad, më 14 nëntor.
Ndërsa eventi WWE Crown Jewel 2026 do të zhvillohet këtë fundjavë, por në një lokacion tjetër. Fillimisht ishte planifikuar në Kingdom Arena, por organizatorët e kanë zhvendosur në ANB Arena. Në program janë përfshirë emra të njohur si Roman Reigns, Sami Zayn, Liv Morgan, Cody Rhodes dhe Randy Orton.
Anulime dhe shtyrje edhe në sportet e tjera
Lista e aktiviteteve të prekura nga situata në rajon është edhe më e gjatë. FIFAe Finals, turneu i sporteve elektronike i organizuar nga FIFA, duhej të mbahej muajin e kaluar në Xhedah, por u anulua.
Po ashtu, nuk do të zhvillohen Kampionatet Botërore të Çiklizmit Urban, të planifikuara këtë javë në Riad, ku do të merrnin pjesë garuesit më të mirë në disiplinat BMX Freestyle dhe trials.
Edhe turneu PIF Saudi International, aktiviteti përmbyllës i sezonit të Asian Tour në golf, i planifikuar për 18-21 nëntor në Riad, është anuluar. Organizatorët kanë përmendur vështirësitë organizative dhe logjistike që lidhen me zhvillimin e garës.
Ndërkohë, Professional Triathletes Organisation ka vendosur të zhvendosë garat Saudi Arabia T100 dhe World Triathlon Cup në Xhedah. Në vend që të zhvillohen në fund të këtij muaji, ato janë shtyrë për 16-17 prill.
Zhvillimet e fundit tregojnë se konflikti në Lindjen e Mesme nuk po prek vetëm organizatorët dhe sportistët, por edhe kalendarin ndërkombëtar të garave. Ndërsa disa aktivitete janë anuluar ose zhvendosur, të tjera mbeten në pritje të vlerësimeve të reja të sigurisë./PinkBizz.com