Real Madridi po e shqyrton mundësinë e transferimit të mbrojtësit të djathtë të Tottenhamit, Pedro Porro, i cili mund të rikthehet në futbollin spanjoll, raportojnë mediat iberike.
Sipas Cadena SER, reprezentuesi spanjoll është i interesuar për t’u rikthyer në La Liga, pavarësisht se së fundmi ka vazhduar kontratën me Tottenhamin deri në vitin 2031.
Për shërbimet e tij interesim ka shfaqur edhe Barcelona, e cila tashmë ka kërkuar informacione për mundësinë e transferimit të mbrojtësit.
Megjithatë, Porro dëshiron të presë për të parë nëse Real Madridi do të bëjë një lëvizje konkrete për ta transferuar, përpara se të marrë një vendim për të ardhmen e tij.
Një nga faktorët që mund të ndikojë në vendimin e tij është forma e Tottenhamit. Sipas raportimeve, gjendja e skuadrës angleze mund të ndikojë edhe në pozitën e tij te Kombëtarja e Spanjës, ku ai është bërë një lojtar i rëndësishëm nën drejtimin e Luis de la Fuentes.
Real Madridi e kishte monitoruar Porron edhe më herët, por nuk kishte vazhduar me transferimin e tij. Tani, pasiguria rreth Trent Alexander-Arnold në krahun e djathtë të mbrojtjes mund ta rikthejë spanjollin në listën e objektivave të klubit madrilen.
Për momentin, Barcelona raportohet se ka një pozitë më të favorshme në garën për mbrojtësin. Megjithatë, gazetari Pacojó Delgado ka theksuar se kalimi te Real Madridi mbetet një mundësi serioze nëse klubi madrilen vendos të paraqesë një ofertë konkrete.
Kështu, e ardhmja e Pedro Porros mund të kthehet në një nga temat kryesore të afatit kalimtar, me Barcelonën dhe Real Madridin që mund të garojnë për nënshkrimin e tij./pinkbizz.com